يكتب الشاعر نشأت عادل
فجأة نسيت....
حاولت اجمع
حروف إسمك
لقيتها دُخَان..
كأن اللى مابينَّا
ماكان..
صاب العقل
لحظة عقل
غرامي الصعب
أصبح سهل
صحيت قلبي
ماهوش
زعلان
بقيت فرحان..
أنا القلب اللى ما
اتهناش ب غير
قلبك
انا المسحور ب
نور عينك
انا الحب اللي
حبيته عشان
حبك
انا العشق اللي
ب يزينك
انا اللى فتحت
أبوابي
ومَلِّكتِك على
سنيني
انا اللي صحيت
على غفلة
لقيتنى لوحدى
ف الحفلة
وبسأل قالوا
سيبتيني
كأنى ف حلم
منه صحيت
لقيت نفسي
ف عصر الغاب
ب لا أسباب
لا انا عارف فاتتني
ليه!!
ولا لاقى ل سؤالى
جواب
ولا مُهتَم...
ضِحِكت كتير
وانا ب ابكي
على الحلم اللي
ماحلمتوش
واقسمت اني
مش ح احكي
عن الحب اللي
مانسيتهوش
عن الليل اللى
ما نمته
وانا ب اكتب
ف عينك شِعر
عن الشوق اللي
نَيِّمتُه
وسهرني ل آدان
الفجر
عن العُزلة
ومرار الهَجر
عن العذر اللي
ألِّفتُه
عشان القى ل
غَدرِك عُذر
عشقتينى!!!!!!!!
ما اظنش يوم
عرفتي الحب
وجايز برضه
مافهمتيش
أنا عارف غرامي
صَعب
وجايز قلبي
مافهمكيش
ماهو ب يفهم
يادوب
طراطيش
ولو كان فِهمُه
ب القنطار
ما كانش احتار
ولا انهار تحت
اعتابك..
وكان لسه
يادوب تناتيش
وب تخبط على
بابك
فتحتى لها...
بيبانك ليه؟؟
عشان تكبر..
وتتمنى
ويكبر حلمي
أُدَّامي
وتتمَسِّك آمالى
بيه
وفجأة الاقيكي
على غفلة
ماكنتيش أد
احلامي
صحيت منها
ومالقتكيش
ماتستاهليش...
أعيش مع
ذكرى بهتانة
طوتها صفحة
النسيان
وصورة ل
شبه إنسانة
ماتشبهش
بنى الإنسان
خيانتك بس
تشبه لك
جرحتى قلبي
من جهلك
ح اعيش
العمر من
بعدك بدونك
وأبقى أنا
الكسبان
يجوز صعب
إني بعدِك
اعيش لكن
برضك
ماتستاهليش...
حيطان البيت
ب تسألني
ومش عارف
أرد ب إيه.
خيالك ب
ابعِدُه عنِّى.....
واغمَّض
عينى برضه ألاقيه
عبيرك لسه ف
الأوضة
عبايتك لسه
موجودة.
وشنطة إيدك
السودة.
وكتفى اللى
انتى نمتى
عليه
كرهته ولسه
ما كرهكيش
ماتستاهليش...
تكوني حلمي
لو لحظة......
لامؤاخذة...
ح اعيش......
حلمى...........
وما انتيش
فيه...............
وبرضه ح اعيش
وح انساكِ
وذكراكِ........
ماتلزمنيش
ماتستاهليش...
د/نشأت عادل
تعليقات
إرسال تعليق