يكتب الشاعر/احمد الصاوي
( ؛ مره يا جِدي ؛ )
مره يا جدي
قريت ف دفاترك
كل حكايه
بتحكي دموع
وتصور فكرك
تحكي أماني
تايها يا عيني
ف سنين عمرك
كنت ياجدي حاطط
ف كتابك
بعض هوامش
ثابت فيها كل مثالب
ف تاريخ هدك
يدخل جدي
يقولي يا إبني
ليه بتنعكش
ولا تفتش
ع اللي يصيبك
ويزيد يأسك
قلت يا جدي
والله دي حاله
كل هوامشك
تحكي همومنا
تحكي مخازي
ف كل بلادنا
تحكي خيانه
لقلب سمانا
تحكي الكُرسي
وطّى الهامه
حتى الرايه
تبكي الخزي
لحُكم الغايه
وتكون بيعه
لكُل حقوقنا
ونبقى مطيّه
كمان خسرانه
قولي يا جدي
هيه هوامشك
قاصدة حاضرنا
ولا جدودك ؟
إسمع يا ابني
كل تاريخنا
حلقه ودايره
بكل الخيبه
إلا ثواني
ف بحر العِزه
حتى دا ناضب
منها دي خيبه
بُص يا إبني
عُمر تاريخنا
ما كان حكّيوه
بس بخدعه
قالوه حدوته
وخلاص فاتت
بعد ما باتت
فوق الرفّ
بعرض الحيطه
لأه يا جدي
إوعى تقولي
وتزيد همي
بُص للْمحه
( وابني ) عليها
واردم حُفره
ف يوم نفاديها
بُص يا إبني
الحل معاكوا
خلّي الرفّ
يقول وياكوا
خليه يحكي
كل قواعد
حتى دروس
وسُنن فايتاكوا
بيها الدنيا
تطاطي براسها
ونلحق فيها
كل ما فاتنا
أسمع جدي
وتنام عيني
أحلم واجري
لكُل لِعبنا
وفصل النت
يطلع عيني
ألعب بابجي
ولا دا ماريو
ولا مزارع
حلوه سعيدة
بص لي جدي
شافني بخطرف
منها الليله
يسمع جدي
يميل راسُه
يسمع مني
بنادي ف صاحبي
يلّا يا يا صاحبي
خُد لي ف بالك
وطي دماغك
حد بيضرب
إوعى يصيبك
أصلُه هناك ع التبه
يجيبك يرمي
قنابل يلّا معايه
خليك صاحي
إوعى تخاطر
أمنّ نفسك
خليك خافي
فجأة و جِدي
يحرك فيّه
ودمعُه يقولي
سايبني بناحِي
فجأة الخردة
تلف تنادي
أي قديم
وعقول بتنافي
قلت يا جدي
شكل هوامشك
ويّا تاريخك ويّا دا عقلك
كُله ينافي
....... .... ..
أحمد الصاوي ١٢ / ٢ / ٢٠٢١
سؤال موجّه إلي لماذا أقرأ تاريخ الأمم
فكانت محصلة السؤال والإجابة
تلك القصيدة
( أسألكُم الدعاء ) .
تعليقات
إرسال تعليق